SP: זה יתנו כל העבר על הפקדים מחצית השקל בשקל הקדש ושקל הקדש עשרים גרה הוא השקל תרומה ליהוה
MT: זה׀ יתנו כל העבר על הפקדים מחצית השׁקל בשׁקל הקדשׁ עשׂרים גרה השׁקל מחצית השׁקל תרומה ליהוה
SP: כל העבר על הפקדים מבן עשרים שנה ומעלה יתנו את תרומת יהוה
MT: כל העבר על הפקדים מבן עשׂרים שׁנה ומעלה יתן תרומת יהוה
SP: ולקחת את כסף הכפורים מאת בני ישראל ונתתה אתו אל עבדת אהל מועד והיה לבני ישראל לזכרון לפני יהוה לכפר על נפשתיכם
MT: ולקחת את כסף הכפרים מאת בני ישׂראל ונתת אתו על עבדת אהל מועד והיה לבני ישׂראל לזכרון לפני יהוה לכפר על נפשׁתיכם
SP: ועשית כיור נחשת וכנו נחשת לרחצה ונתתה אתו בין אהל מועד ובין המזבח ונתתה שם מים
MT: ועשׂית כיור נחשׁת וכנו נחשׁת לרחצה ונתת אתו בין אהל מועד ובין המזבח ונתת שׁמה מים
SP: ורחץ ממנו אהרן ובניו את ידיהם ואת רגליהם
MT: ורחצו אהרן ובניו ממנו את ידיהם ואת רגליהם
SP: בבאם אל אהל מועד ירחצו מים ולא ימותו או בגשתם אל המזבח לשרת להקטיר אשה ליהוה
MT: בבאם אל אהל מועד ירחצו מים ולא ימתו או בגשׁתם אל המזבח לשׁרת להקטיר אשׁה ליהוה
SP: ירחצו ידיהם ורגליהם ולא ימותו והיתה להם חקות עולם לו ולזרעו לדרותם
MT: ורחצו ידיהם ורגליהם ולא ימתו והיתה להם חק עולם לו ולזרעו לדרתם
SP: ואתה קח לך בשמים ראש מרדרור חמש מאות וקנמון בשם מחציתו חמשים ומאתים וקנה בשם חמשים ומאתים
MT: ואתה קח לך בשׂמים ראשׁ מר דרור חמשׁ מאות וקנמן בשׂם מחציתו חמשׁים ומאתים וקנה בשׂם חמשׁים ומאתים
SP: ומשחת בו את אהל מועד ואת ארון העדות
MT: ומשׁחת בו את אהל מועד ואת ארון העדת
SP: את השלחן ואת כל כליו את המנורה ואת כל כליה
MT: ואת השׁלחן ואת כל כליו ואת המנרה ואת כליה ואת מזבח הקטרת
SP: את מזבח הקטרת ואת מזבח העלה ואת כל כליו את הכיור ואת כנו
MT: ואת מזבח העלה ואת כל כליו ואת הכיר ואת כנו
SP: על בשר אדם לא יוסך ובתכנתו לא תעשו כמהו קדש הוא וקדש יהיה לכם
MT: על בשׂר אדם לא ייסך ובמתכנתו לא תעשׂו כמהו קדשׁ הוא קדשׁ יהיה לכם
SP: וידבר יהוה אל משה לאמר קח לך סמים נטף ושחלת וחלבניה סמים ולבונה זכה בד בבד יהיה
MT: ויאמר יהוה אל משׁה קח לך סמים נטף׀ ושׁחלת וחלבנה סמים ולבנה זכה בד בבד יהיה
SP: ועשית אתו קטרת רקח מעשה רקח ממלחת טהור קדש
MT: ועשׂית אתה קטרת רקח מעשׂה רוקח ממלח טהור קדשׁ
SP: ושחקת ממנו הדק ונתתה ממנו לפני העדות באהל מועד אשר אועד לך שמה קדש קדשים תהיה לכם
MT: ושׁחקת ממנה הדק ונתתה ממנה לפני העדת באהל מועד אשׁר אועד לך שׁמה קדשׁ קדשׁים תהיה לכם
SP: והקטרת אשר תעשה במתכנתה לא תעשו לכם קדש תהיה לכם ליהוה
MT: והקטרת אשׁר תעשׂה במתכנתה לא תעשׂו לכם קדשׁ תהיה לך ליהוה
SP: ראה קראתי בשם בצלאל בן חורי בן חור למטה יהודה
MT: ראה קראתי בשׁם בצלאל בן אורי בן חור למטה יהודה
SP: ולחשב מחשבות לעשות בזהב ובכסף ובנחשת
MT: לחשׁב מחשׁבת לעשׂות בזהב ובכסף ובנחשׁת
SP: ואני הנה נתתי אתו את אהליאב בן אחיסמך למטה דן ובלב כל חכם לב נתתי חכמה ועשו את כל אשר צויתיך
MT: ואני הנה נתתי אתו את אהליאב בן אחיסמך למטה דן ובלב כל חכם לב נתתי חכמה ועשׂו את כל אשׁר צויתך
SP: את אהל מועד ואת הארון לעדות ואת הכפרת אשר עליו ואת כל כלי האהל
MT: את׀ אהל מועד ואת הארן לעדת ואת הכפרת אשׁר עליו ואת כל כלי האהל
SP: את השלחן ואת כל כליו את המנורה הטהרה ואת כל כליה את מזבח הקטרת
MT: ואת השׁלחן ואת כליו ואת המנרה הטהרה ואת כל כליה ואת מזבח הקטרת
SP: ואת מזבח העלה ואת כל כליו את הכיור ואת כנו
MT: ואת מזבח העלה ואת כל כליו ואת הכיור ואת כנו
SP: את בגדי השרד ואת בגדי הקדש לאהרן הכהן ואת בגדי בניו לכהן
MT: ואת בגדי השׂרד ואת בגדי הקדשׁ לאהרן הכהן ואת בגדי בניו לכהן
SP: את שמן המשחה ואת קטרת הסמים לקדש ככל אשר צויתיך יעשו
MT: ואת שׁמן המשׁחה ואת קטרת הסמים לקדשׁ ככל אשׁר צויתך יעשׂו
SP: וידבר יהוה אל משה לאמר
MT: ויאמר יהוה אל משׁה לאמר
SP: ואתה דבר אל בני ישראל לאמר אך את שבתתי תשמרו כי אות היא ביני ובינכם לדרתיכם לדעת כי אני יהוה מקדשכם
MT: ואתה דבר אל בני ישׂראל לאמר אך את שׁבתתי תשׁמרו כי אות הוא ביני וביניכם לדרתיכם לדעת כי אני יהוה מקדשׁכם
SP: ושמרתם את השבת כי קדש היא לכם מחלליה מות יומת כי כל העשה בה מלאכה ונכרתה הנפש ההיא מקרב עמיה
MT: ושׁמרתם את השׁבת כי קדשׁ הוא לכם מחלליה מות יומת כי כל העשׂה בה מלאכה ונכרתה הנפשׁ ההוא מקרב עמיה
SP: ביני ובין בני ישראל אות היא לעולם כי ששת ימים עשה יהוה את השמים ואת הארץ וביום השביעי שבת וינפש
MT: ביני ובין בני ישׂראל אות הוא לעלם כי שׁשׁת ימים עשׂה יהוה את השׁמים ואת הארץ וביום השׁביעי שׁבת וינפשׁ
SP: ויתן אל משה ככלותו לדבר אתו בהר סיני את שני לוחת העדות לוחת אבנים כתובים באצבע אלהים
MT: ויתן אל משׁה ככלתו לדבר אתו בהר סיני שׁני לחת העדת לחת אבן כתבים באצבע אלהים
SP: וירא העם כי בשש משה לרדת מן ההר ויקהל העם על אהרן ויאמרו אליו קום עשה לנו אלהים אשר ילכו לפנינו כי זה משה האיש אשר העלנו מארץ מצרים לא ידענו מה היה לו
MT: וירא העם כי בשׁשׁ משׁה לרדת מן ההר ויקהל העם על אהרן ויאמרו אליו קום׀ עשׂה לנו אלהים אשׁר ילכו לפנינו כי זה׀ משׁה האישׁ אשׁר העלנו מארץ מצרים לא ידענו מה היה לו
SP: ויאמר אליהם אהרן פרקו את נזמי הזהב אשר באזני נשיכם בניכם ובנתיכם והביאו אלי
MT: ויאמר אלהם אהרן פרקו נזמי הזהב אשׁר באזני נשׁיכם בניכם ובנתיכם והביאו אלי
SP: וישכמו ממחרת ויעלו עלות ויגישו שלמים וישב העם לאכל ושתו ויקמו לצחק
MT: וישׁכימו ממחרת ויעלו עלת ויגשׁו שׁלמים וישׁב העם לאכל ושׁתו ויקמו לצחק
SP: וידבר יהוה אל משה לאמר לך רד כי שחת עמך אשר העלית מארץ מצרים
MT: וידבר יהוה אל משׁה לך רד כי שׁחת עמך אשׁר העלית מארץ מצרים
SP: ועתה הניחה לי ויחר אפי בם ואכלם ואעשה אתך לגוי גדול ובאהרן התאנף יהוה מאד להשמידו ויתפלל משה בעד אהרן
MT: ועתה הניחה לי ויחר אפי בהם ואכלם ואעשׂה אותך לגוי גדול
SP: ויחל משה את פני יהוה אלהיו ויאמר למה יהוה יחר אפך בעמך אשר הוצאת ממצרים בכח גדול ובזרוע נטויה
MT: ויחל משׁה את פני יהוה אלהיו ויאמר למה יהוה יחרה אפך בעמך אשׁר הוצאת מארץ מצרים בכח גדול וביד חזקה
SP: למה יאמרו מצרים לאמר ברעה הוציאם להרג אתם בהרים ולכלותם מעל פני האדמה שוב מחרון אפך והנחם על הרעה לעמך
MT: למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שׁוב מחרון אפך והנחם על הרעה לעמך
SP: זכור לאברהם ליצחק וליעקב עבדיך אשר נשבעת להם בך ותדבר אליהם הרבה ארבה את זרעכם ככוכבי השמים וכל הארץ הזאת אשר אמרתי אתן לזרעכם ונחלוה לעולם
MT: זכר לאברהם ליצחק ולישׂראל עבדיך אשׁר נשׁבעת להם בך ותדבר אלהם ארבה את זרעכם ככוכבי השׁמים וכל הארץ הזאת אשׁר אמרתי אתן לזרעכם ונחלו לעלם
SP: ויפן וירד משה מן ההר ושני לוחת העדות בידו לוחת כתובים משני עבריהם מזה ומזה הם כתובים
MT: ויפן וירד משׁה מן ההר ושׁני לחת העדת בידו לחת כתבים משׁני עבריהם מזה ומזה הם כתבים
SP: והלוחות מעשה אלהים הם והמכתב מכתב אלהים הוא חרות על הלוחות
MT: והלחת מעשׂה אלהים המה והמכתב מכתב אלהים הוא חרות על הלחת
SP: ויאמר אין קול ענות גברה ואין קול ענות חלושה קול עונות אנכי שמע
MT: ויאמר אין קול ענות גבורה ואין קול ענות חלושׁה קול ענות אנכי שׁמע
SP: ויהי כאשר קרב אל המחנה וירא את העגל ואת המחלות ויחר אף משה וישליך מידיו את הלוחות וישבר אתם בתחתית ההר
MT: ויהי כאשׁר קרב אל המחנה וירא את העגל ומחלת ויחר אף משׁה וישׁלך מידו את הלחת וישׁבר אתם תחת ההר
SP: ויקח את העגל אשר עשו וישרפהו באש ויטנחהו עד אשר דק ויזר על פני המים וישק את בני ישראל
MT: ויקח את העגל אשׁר עשׂו וישׂרף באשׁ ויטחן עד אשׁר דק ויזר על פני המים וישׁק את בני ישׂראל
SP: ויאמר אהרן אל יחר אף אדני אתה ידעת את העם כי פרוע הוא
MT: ויאמר אהרן אל יחר אף אדני אתה ידעת את העם כי ברע הוא
SP: ויאמרו לי עשה לנו אלהים אשר ילכו לפנינו כי זה משה האיש אשר העלנו מארץ מצרים לא ידענו מה היה לו
MT: ויאמרו לי עשׂה לנו אלהים אשׁר ילכו לפנינו כי זה׀ משׁה האישׁ אשׁר העלנו מארץ מצרים לא ידענו מה היה לו
SP: ואמר להם למי זהב התפרקו ויתנו לי ואשליכהו באש ויצא העגל הזה
MT: ואמר להם למי זהב התפרקו ויתנו לי ואשׁלכהו באשׁ ויצא העגל הזה
SP: וירא משה את העם כי פרוע הוא כי פרעו אהרן לשמצו בקומיהם
MT: וירא משׁה את העם כי פרע הוא כי פרעה אהרן לשׁמצה בקמיהם
SP: ויאמר להם כה אמר יהוה אלהי ישראל שימו איש חרבו על ירכו ועברו ושובו משער לשער במחנה והרגו איש את אחיו ואיש את רעהו ואיש את קריבו
MT: ויאמר להם כה אמר יהוה אלהי ישׂראל שׂימו אישׁ חרבו על ירכו עברו ושׁובו משׁער לשׁער במחנה והרגו אישׁ את אחיו ואישׁ את רעהו ואישׁ את קרבו
SP: ויעשו בני לוי כדבר משה ויפל מן העם ביום ההוא כשלשת אלפים איש
MT: ויעשׂו בני לוי כדבר משׁה ויפל מן העם ביום ההוא כשׁלשׁת אלפי אישׁ
SP: ויאמר משה מלאו ידיכם היום ליהוה כי איש בבנו ובאחיו ולתת עליכם היום ברכה
MT: ויאמר משׁה מלאו ידכם היום ליהוה כי אישׁ בבנו ובאחיו ולתת עליכם היום ברכה
SP: ויהי ממחרת ויאמר משה אל העם אתם חטאתם חטאה גדלה ועתה אעלה אל יהוה אולי אכפר בעד חטאתיכם
MT: ויהי ממחרת ויאמר משׁה אל העם אתם חטאתם חטאה גדלה ועתה אעלה אל יהוה אולי אכפרה בעד חטאתכם
SP: וישב משה אל יהוה ויאמר הנה חטא העם הזה חטאה גדלה ויעשו להם אלהי זהב
MT: וישׁב משׁה אל יהוה ויאמר אנא חטא העם הזה חטאה גדלה ויעשׂו להם אלהי זהב
SP: ועתה אם תשא חטאתם שא ואם אין מחני מספרך אשר כתבת
MT: ועתה אם תשׂא חטאתם ואם אין מחני נא מספרך אשׁר כתבת
SP: ויאמר יהוה אל משה מי אשר חטא לי אמחנו מספרי
MT: ויאמר יהוה אל משׁה מי אשׁר חטא לי אמחנו מספרי
SP: ועתה לך נחה את העם על אשר דברתי לך והנה מלאכי ילך לפניך וביום פקודי ופקדתי עליהם חטאתם
MT: ועתה לך׀ נחה את העם אל אשׁר דברתי לך הנה מלאכי ילך לפניך וביום פקדי ופקדתי עליהם חטאתם
SP: וידבר יהוה אל משה לאמר לך עלה מזה אתה והעם אשר העלית מארץ מצרים אל הארץ אשר נשבעתי לאברהם ליצחק וליעקב לאמר לזרעך אתננה
MT: וידבר יהוה אל משׁה לך עלה מזה אתה והעם אשׁר העלית מארץ מצרים אל הארץ אשׁר נשׁבעתי לאברהם ליצחק וליעקב לאמר לזרעך אתננה
SP: ושלחתי לפניך מלאך וגרשתי את הכנעני והאמרי והחתי והגרגשי והפרזי והחוי והיבוסי
MT: ושׁלחתי לפניך מלאך וגרשׁתי את הכנעני האמרי והחתי והפרזי החוי והיבוסי
SP: ויאמר יהוה אל משה אמר אל בני ישראל אתם עם קשה ערף רגע אחד אעלה בקרבך וכליתיך ועתה הוריד עדיך מעליך ואדעה מה אעשה לך
MT: ויאמר יהוה אל משׁה אמר אל בני ישׂראל אתם עם קשׁה ערף רגע אחד אעלה בקרבך וכליתיך ועתה הורד עדיך מעליך ואדעה מה אעשׂה לך
SP: ומשה יקח את האהל ונטה לו מחוץ למחנה הרחיק מן המחנה וקרא לו אהל מועד והיו כל מבקשי יהוה יצאו אל אהל מועד אשר מחוץ למחנה
MT: ומשׁה יקח את האהל ונטה לו׀ מחוץ למחנה הרחק מן המחנה וקרא לו אהל מועד והיה כל מבקשׁ יהוה יצא אל אהל מועד אשׁר מחוץ למחנה
SP: והיה כבוא משה האהל ירד עמוד הענן ועמד פתח האהל ודבר עם משה
MT: והיה כבא משׁה האהלה ירד עמוד הענן ועמד פתח האהל ודבר עם משׁה
SP: וראו כל העם את עמוד הענן עמד פתח האהל וקמו כל העם והשתחוו איש פתח אהלו
MT: וראה כל העם את עמוד הענן עמד פתח האהל וקם כל העם והשׁתחוו אישׁ פתח אהלו
SP: ודבר יהוה אל משה פנים אל פנים כאשר ידבר איש אל רעהו ושב אל המחנה ומשרתו יהושע בן נון נער לא ימוש מתוך האהל
MT: ודבר יהוה אל משׁה פנים אל פנים כאשׁר ידבר אישׁ אל רעהו ושׁב אל המחנה ומשׁרתו יהושׁע בן נון נער לא ימישׁ מתוך האהל
SP: ועתה אם נא מצאתי חן בעיניך הודעני נא את דרכיך ואדעך למען אמצא חן בעיניך וראה כי עמך הגוי הזה
MT: ועתה אם נא מצאתי חן בעיניך הודעני נא את דרכך ואדעך למען אמצא חן בעיניך וראה כי עמך הגוי הזה
SP: ויאמר אליו אם אין פניך הלכים אל תעלני מזה
MT: ויאמר אליו אם אין פניך הלכים אל תעלנו מזה
SP: ובמה יודע אפוא כי מצאתי חן בעיניך אני ועמך הלוא בלכתך עמנו ונפלאנו אני ועמך מכל העם אשר על פני האדמה
MT: ובמה׀ יודע אפוא כי מצאתי חן בעיניך אני ועמך הלוא בלכתך עמנו ונפלינו אני ועמך מכל העם אשׁר על פני האדמה
SP: ויאמר הראני נא את כבודך
MT: ויאמר הראני נא את כבדך
SP: ויאמר לא תוכל לראות פני כי לא יראני האדם וחי
MT: ויאמר לא תוכל לראת את פני כי לא יראני האדם וחי
SP: והיה בעבר כבודי ושמתיך בנקירות הצור ושכתי כפי עליך עד עברי
MT: והיה בעבר כבדי ושׂמתיך בנקרת הצור ושׂכתי כפי עליך עד עברי
SP: והסרתי כפי וראית את אחרי ופני לא יראו
MT: והסרתי את כפי וראית את אחרי ופני לא יראו
SP: ויאמר יהוה אל משה פסל לך שני לוחת אבנים כראישונים וכתבתי על הלוחות את הדברים אשר היו על הלוחות הראישונים אשר שברת
MT: ויאמר יהוה אל משׁה פסל לך שׁני לחת אבנים כראשׁנים וכתבתי על הלחת את הדברים אשׁר היו על הלחת הראשׁנים אשׁר שׁברת
SP: והוי נכון לבקר ועלית בבקר אל הר סיני ונצבת לי שם על ראש ההר
MT: והיה נכון לבקר ועלית בבקר אל הר סיני ונצבת לי שׁם על ראשׁ ההר
SP: ואיש לא יעלה עמך וגם איש אל יראה בכל ההר וגם צאן ובקר אל ירעו אל מול ההר ההוא
MT: ואישׁ לא יעלה עמך וגם אישׁ אל ירא בכל ההר גם הצאן והבקר אל ירעו אל מול ההר ההוא
SP: ויפסל משה שני לוחת אבנים כראישונים וישכם בבקר ויעל אל הר סיני כאשר צוה יהוה אתו ויקח בידו שני לוחת אבנים
MT: ויפסל שׁני לחת אבנים כראשׁנים וישׁכם משׁה בבקר ויעל אל הר סיני כאשׁר צוה יהוה אתו ויקח בידו שׁני לחת אבנים
SP: ויעבר יהוה על פניו ויקרא יהוה יהוה אל רחום וחנון ארך אפים ורב חסד ואמת
MT: ויעבר יהוה׀ על פניו ויקרא יהוה׀ יהוה אל רחום וחנון ארך אפים ורב חסד ואמת
SP: נצר חסד לאלפים נשא עון ופשע וחטאה ונקה לו ינקה פקד עון אבות על בנים ועל בני בנים על שלישים ועל רביעים
MT: נצר חסד לאלפים נשׂא עון ופשׁע וחטאה ונקה לא ינקה פקד׀ עון אבות על בנים ועל בני בנים על שׁלשׁים ועל רבעים
SP: וימהר משה ויקד ארצה וישתחוי
MT: וימהר משׁה ויקד ארצה וישׁתחו
SP: ויאמר אם נא מצאתי חן בעיניך אדני ילך נא אדני בקרבנו כי עם קשה ערף הוא וסלחת לעוננו ולחטאתינו ונחלתנו
MT: ויאמר אם נא מצאתי חן בעיניך אדני ילך נא אדני בקרבנו כי עם קשׁה ערף הוא וסלחת לעוננו ולחטאתנו ונחלתנו
SP: ויאמר הנה אנכי כרת ברית נגד כל עמך אעשה נפלאות אשר לא נבראו בכל הארץ ובכל הגוים וראה כל העם אשר אתה בקרבו את מעשה יהוה כי נורא הוא אשר אני עשה עמך
MT: ויאמר הנה אנכי כרת ברית נגד כל עמך אעשׂה נפלאת אשׁר לא נבראו בכל הארץ ובכל הגוים וראה כל העם אשׁר אתה בקרבו את מעשׂה יהוה כי נורא הוא אשׁר אני עשׂה עמך
SP: שמור לך את אשר אנכי מצוך היום הנני גרש מפניך את הכנעני והאמרי והחתי והגרגשי והפרזי והחוי והיבוסי
MT: שׁמר לך את אשׁר אנכי מצוך היום הנני גרשׁ מפניך את האמרי והכנעני והחתי והפרזי והחוי והיבוסי
SP: השמר לך פן תכרת ברית ליושב הארץ אשר אתה בא עליו פן יהיה למוקש בקרבך
MT: השׁמר לך פן תכרת ברית ליושׁב הארץ אשׁר אתה בא עליה פן יהיה למוקשׁ בקרבך
SP: כי את מזבחתיהם תתצון ומצבתיהם תשברון ואשריהם תכרתון
MT: כי את מזבחתם תתצון ואת מצבתם תשׁברון ואת אשׁריו תכרתון
SP: כי לא תשתחוי לאל אחר כי יהוה קנא שמו אל קנא הוא
MT: כי לא תשׁתחוה לאל אחר כי יהוה קנא שׁמו אל קנא הוא
SP: פן תכרת ברית ליושב הארץ וזנו אחרי אלהיהם וזבחו לאלהיהם וקרא לך ואכלת מזבחו
MT: פן תכרת ברית ליושׁב הארץ וזנו׀ אחרי אלהיהם וזבחו לאלהיהם וקרא לך ואכלת מזבחו
SP: את חג המצות תשמר שבעת ימים תאכל מצות כאשר צויתיך למועד חדש האביב כי בו יצאת ממצרים
MT: את חג המצות תשׁמר שׁבעת ימים תאכל מצות אשׁר צויתך למועד חדשׁ האביב כי בחדשׁ האביב יצאת ממצרים
SP: כל פטר רחם לי וכל מקניך תזכיר פטר שור ושה
MT: כל פטר רחם לי וכל מקנך תזכר פטר שׁור ושׂה
SP: ופטר חמור תפדה בשה ואם לא תפדנו וערפתו וכל בכור אדם בבניך תפדה ולא יראו פני רקים
MT: ופטר חמור תפדה בשׂה ואם לא תפדה וערפתו כל בכור בניך תפדה ולא יראו פני ריקם
SP: וחג שבעות תעשה לך בכורי קציר חטים וחג האסף תקופת השנה
MT: וחג שׁבעת תעשׂה לך בכורי קציר חטים וחג האסיף תקופת השׁנה
SP: שלש פעמים בשנה יראה כל זכורך את פני הארון יהוה אלהי ישראל
MT: שׁלשׁ פעמים בשׁנה יראה כל זכורך את פני האדן׀ יהוה אלהי ישׂראל
SP: כי אוריש גוים רבים מפניך והרחבתי את גבולך ולא יחמד איש את ארצך בהעלותך להראות את פני יהוה אלהיך שלש פעמים בשנה
MT: כי אורישׁ גוים מפניך והרחבתי את גבולך ולא יחמד אישׁ את ארצך בעלתך לראות את פני יהוה אלהיך שׁלשׁ פעמים בשׁנה
SP: ויאמר יהוה אל משה כתב לך את הדברים האלה כי על פי הדברים האלה כרתי אתך ברית ואת ישראל
MT: ויאמר יהוה אל משׁה כתב לך את הדברים האלה כי על פי׀ הדברים האלה כרתי אתך ברית ואת ישׂראל
SP: ויהי שם לפני יהוה ארבעים יום וארבעים לילה לחם לא אכל ומים לא שתה ויכתב על הלוחות את דברי הברית עשרת הדברים
MT: ויהי שׁם עם יהוה ארבעים יום וארבעים לילה לחם לא אכל ומים לא שׁתה ויכתב על הלחת את דברי הברית עשׂרת הדברים
SP: ויהי ברדת משה מהר סיני ושני לוחת העדות בידו ברדתו מן ההר ומשה לא ידע כי קרן עור פניו בדברו אתו
MT: ויהי ברדת משׁה מהר סיני ושׁני לחת העדת ביד משׁה ברדתו מן ההר ומשׁה לא ידע כי קרן עור פניו בדברו אתו
SP: ויקרא אליהם משה וישבו אליו אהרן וכל הנשיאים בעדה וידבר משה אליהם
MT: ויקרא אלהם משׁה וישׁבו אליו אהרן וכל הנשׂאים בעדה וידבר משׁה אלהם
SP: ואחרי כן נגשו אליו כל בני ישראל ויצום את כל אשר דבר יהוה אתו בהר סיני
MT: ואחרי כן נגשׁו כל בני ישׂראל ויצום את כל אשׁר דבר יהוה אתו בהר סיני
SP: ובבא משה לפני יהוה לדבר אתו יסיר את המסוה עד צאתו ויצא ודבר אל בני ישראל את כל אשר יצוהו
MT: ובבא משׁה לפני יהוה לדבר אתו יסיר את המסוה עד צאתו ויצא ודבר אל בני ישׂראל את אשׁר יצוה
SP: וראו בני ישראל את פני משה כי קרן עור פני משה והשיב את המסוה על פניו עד באו לדבר אתו
MT: וראו בני ישׂראל את פני משׁה כי קרן עור פני משׁה והשׁיב משׁה את המסוה על פניו עד באו לדבר אתו