SP: ויעתר יצחק אל יהוה לנכח אשתו כי עקרה היא ויעתר לו יהוה ותהר רבקה אשתו
MT: ויעתר יצחק ליהוה לנכח אשׁתו כי עקרה הוא ויעתר לו יהוה ותהר רבקה אשׁתו
SP: ויאמר יהוה לה שני גוים בבטנך ושני לאמים ממעיך יפרדו ולאם מלאם יאמץ ורב יעבד צעיר
MT: ויאמר יהוה לה שׁני גיים בבטנך ושׁני לאמים ממעיך יפרדו ולאם מלאם יאמץ ורב יעבד צעיר
SP: וימלאו ימיה ללדת והנה תאמים בבטנה
MT: וימלאו ימיה ללדת והנה תומם בבטנה
SP: ויצא הראישון אדמוני כלו כאדרת שער ויקראו שמו עשו
MT: ויצא הראשׁון אדמוני כלו כאדרת שׂער ויקראו שׁמו עשׂו
SP: ואחרי כן יצא אחיו וידו אחזת בעקב עשו ויקראו שמו יעקב ויצחק בן ששים שנה בלדת אתם
MT: ואחרי כן יצא אחיו וידו אחזת בעקב עשׂו ויקרא שׁמו יעקב ויצחק בן שׁשׁים שׁנה בלדת אתם
SP: ויאהב יצחק את עשו כי צידו בפיו ורבקה אהבת את יעקב
MT: ויאהב יצחק את עשׂו כי ציד בפיו ורבקה אהבת את יעקב
SP: ויאמר עשו אל יעקב הלעטני נא מן האדום האדם הזה כי עיף אנכי על כן קרא שמו אדום
MT: ויאמר עשׂו אל יעקב הלעיטני נא מן האדם האדם הזה כי עיף אנכי על כן קרא שׁמו אדום
SP: ויאמר עשו הנה אנכי הלך למות ולמה זה לי בכורה
MT: ויאמר עשׂו הנה אנכי הולך למות ולמה זה לי בכרה
SP: ויאמר יעקב השבע לי כיום וישבע לו וימכר את בכורתו ליעקב
MT: ויאמר יעקב השׁבעה לי כיום וישׁבע לו וימכר את בכרתו ליעקב
SP: ויעקב נתן לעשו לחם ונזיד עד שים ויאכל וישת ויקם וילך ויבז עשו את הבכורה
MT: ויעקב נתן לעשׂו לחם ונזיד עדשׁים ויאכל וישׁת ויקם וילך ויבז עשׂו את הבכרה
SP: ויהי רעב בארץ מלבד הרעב הראישון אשר היה בימי אברהם וילך יצחק אל אבימלך מלך פלשתים גררה
MT: ויהי רעב בארץ מלבד הרעב הראשׁון אשׁר היה בימי אברהם וילך יצחק אל אבימלך מלך פלשׁתים גררה
SP: גר בארץ הזאת ואהיה עמך ואברכך כי לך ולזרעך אתן את כל הארצות האלה והקמתי את השבועה אשר נשבעתי לאברהם אביך
MT: גור בארץ הזאת ואהיה עמך ואברכך כי לך ולזרעך אתן את כל הארצת האל והקמתי את השׁבעה אשׁר נשׁבעתי לאברהם אביך
SP: והרביתי את זרעך ככוכבי השמים ונתתי לזרעך את כל הארצות האלה והתברכו בזרעך כל גוי הארץ
MT: והרביתי את זרעך ככוכבי השׁמים ונתתי לזרעך את כל הארצת האל והתברכו בזרעך כל גויי הארץ
SP: עקב אשר שמע אברהם אביך בקולי וישמר משמרתי מצותי חקותי ותורותי
MT: עקב אשׁר שׁמע אברהם בקלי וישׁמר משׁמרתי מצותי חקותי ותורתי
SP: וישאלו אנשי המקום על אשתו ויאמר אחותי היא כי ירא לאמר אשתי היא פן יהרגוני אנשי המקום על רבקה כי טובת מראה היא
MT: וישׁאלו אנשׁי המקום לאשׁתו ויאמר אחתי הוא כי ירא לאמר אשׁתי פן יהרגני אנשׁי המקום על רבקה כי טובת מראה היא
SP: ויהי כאשר הרכו לו שם הימים וישקף אבימלך מלך פלשתים בעד החלון וירא והנה יצחק מצחק את רבקה אשתו
MT: ויהי כי ארכו לו שׁם הימים וישׁקף אבימלך מלך פלשׁתים בעד החלון וירא והנה יצחק מצחק את רבקה אשׁתו
SP: ויקרא אבימלך ליצחק ויאמר אך הנה אשתך היא ואיך אמרת אחותי היא ויאמר אליו יצחק כי אמרתי פן אמות עליה
MT: ויקרא אבימלך ליצחק ויאמר אך הנה אשׁתך הוא ואיך אמרת אחתי הוא ויאמר אליו יצחק כי אמרתי פן אמות עליה
SP: ויצו אבימלך את כל עמו לאמר הנגע באיש הזה ובאשתו מות יומת
MT: ויצו אבימלך את כל העם לאמר הנגע באישׁ הזה ובאשׁתו מות יומת
SP: ויזרע יצחק בארץ ההיא וימצא בשנה ההיא מאה שערים ויברכהו יהוה
MT: ויזרע יצחק בארץ ההוא וימצא בשׁנה ההוא מאה שׁערים ויברכהו יהוה
SP: ויגדל האיש וילך הלך וגדל עד כי גדל מאד
MT: ויגדל האישׁ וילך הלוך וגדל עד כי גדל מאד
SP: וכל הבארות אשר חפרו עבדי אביו בימי אברהם אביו סתמום פלשתים וימלאום עפר
MT: וכל הבארת אשׁר חפרו עבדי אביו בימי אברהם אביו סתמום פלשׁתים וימלאום עפר
SP: וישב יצחק ויחפר את בארות המים אשר חפרו עבדי אברהם אביו ויסתמום פלשתים אחרי מות אברהם ויקרא להן שמות כשמות אשר קרא להן אביו
MT: וישׁב יצחק ויחפר׀ את בארת המים אשׁר חפרו בימי אברהם אביו ויסתמום פלשׁתים אחרי מות אברהם ויקרא להן שׁמות כשׁמת אשׁר קרא להן אביו
SP: ויעתק משם ויחפרו באר אחרת ולא רבו עליה ויקרא שמה רחבות ויאמר כי עתה הרחיב יהוה לנו ופרינו בארץ
MT: ויעתק משׁם ויחפר באר אחרת ולא רבו עליה ויקרא שׁמה רחבות ויאמר כי עתה הרחיב יהוה לנו ופרינו בארץ
SP: ויאמר אליהם יצחק מדוע באתם אלי ואתם שנאתם אתי ותשלחוני מאתכם
MT: ויאמר אלהם יצחק מדוע באתם אלי ואתם שׂנאתם אתי ותשׁלחוני מאתכם
SP: ויאמרו ראו ראינו כי היה יהוה עמך ונאמר תהיה נא אלה בינתנו ביננו ובינך ונכרתה ברית עמך
MT: ויאמרו ראו ראינו כי היה יהוה׀ עמך ונאמר תהי נא אלה בינותינו בינינו ובינך ונכרתה ברית עמך
SP: אם תעשה עמנו רע כאשר לא נגענוך וכאשר עשינו עמך רק טוב ונשלחך בשלום עתה אתה ברוך יהוה
MT: אם תעשׂה עמנו רעה כאשׁר לא נגענוך וכאשׁר עשׂינו עמך רק טוב ונשׁלחך בשׁלום אתה עתה ברוך יהוה
SP: וישכמו בבקר וישבעו איש לרעהו וישלחם יצחק וילכו מאתו בשלום
MT: וישׁכימו בבקר וישׁבעו אישׁ לאחיו וישׁלחם יצחק וילכו מאתו בשׁלום
SP: ויהי ביום ההוא ויבאו עבדי יצחק ויגדו לו על אדות הבאר אשר חפרו ויאמרו לו מצאנו מים
MT: ויהי׀ ביום ההוא ויבאו עבדי יצחק ויגדו לו על אדות הבאר אשׁר חפרו ויאמרו לו מצאנו מים
SP: ויהי עשו בן ארבעים שנה ויקח אשה את יהודית בת בארי החתי ואת בשמת בת אילון החוי
MT: ויהי עשׂו בן ארבעים שׁנה ויקח אשׁה את יהודית בת בארי החתי ואת בשׂמת בת אילן החתי
SP: ותהיינה מרת רוח ליצחק ולרבקה
MT: ותהיין מרת רוח ליצחק ולרבקה
SP: ויהי כי זקן יצחק ותכהנה עיניו מראות ויקרא את עשו בנו הגדול ויאמר אליו בני ויאמר אליו הנני
MT: ויהי כי זקן יצחק ותכהין עיניו מראת ויקרא את עשׂו׀ בנו הגדל ויאמר אליו בני ויאמר אליו הנני
SP: ועתה שא נא כליך תליתך וקשתך וצא השדה וצוד לי ציד
MT: ועתה שׂא נא כליך תליך וקשׁתך וצא השׂדה וצודה לי צידה
SP: ועשה לי מטעמים כאשר אהבתי והבאת לי ואכל בעבור תברכך נפשי בטרם אמות
MT: ועשׂה לי מטעמים כאשׁר אהבתי והביאה לי ואכלה בעבור תברכך נפשׁי בטרם אמות
SP: הבא לי ציד ועשה לי מטעמים ואכלה ואברכך לפני יהוה לפני מותי
MT: הביאה לי ציד ועשׂה לי מטעמים ואכלה ואברככה לפני יהוה לפני מותי
SP: ועתה בני שמע בקולי לאשר אני מצויה אתך
MT: ועתה בני שׁמע בקלי לאשׁר אני מצוה אתך
SP: לך נא אל הצאן וקח לי משם שני גדיי עזים טובים ואעשה אתם מטעמים לאביך כאשר אהב
MT: לך נא אל הצאן וקח לי משׁם שׁני גדיי עזים טבים ואעשׂה אתם מטעמים לאביך כאשׁר אהב
SP: והבאת לאביך ואכל בעבור אשר יברכך לפני מותו
MT: והבאת לאביך ואכל בעבר אשׁר יברכך לפני מותו
SP: ויאמר יעקב אל רבקה אמו הנה עשו אחי איש שעיר ואנכי איש חלק
MT: ויאמר יעקב אל רבקה אמו הן עשׂו אחי אישׁ שׂער ואנכי אישׁ חלק
SP: אולי ימשני אבי והייתי בעיניו כמתעתע והבאת עלי קללה ולא ברכה
MT: אולי ימשׁני אבי והייתי בעיניו כמתעתע והבאתי עלי קללה ולא ברכה
SP: ותאמר לו אמו עלי קללתך בני אך שמע בקולי ולך קח לי
MT: ותאמר לו אמו עלי קללתך בני אך שׁמע בקלי ולך קח לי
SP: ותקח רבקה את בגדי עשו בנה הגדול החמדות אשר אתה בבית ותלביש את יעקב בנה הקטן
MT: ותקח רבקה את בגדי עשׂו בנה הגדל החמדת אשׁר אתה בבית ותלבשׁ את יעקב בנה הקטן
SP: ואת עורות גדיי העזים הלבישה על ידו ועל חלקת צוארו
MT: ואת ערת גדיי העזים הלבישׁה על ידיו ועל חלקת צואריו
SP: ויאמר יצחק אל בנו מה זה מהרת למצא בני ויאמר כי הקרא יהוה אלהיך לפני
MT: ויאמר יצחק אל בנו מה זה מהרת למצא בני ויאמר כי הקרה יהוה אלהיך לפני
SP: ויאמר יצחק אל יעקב גשה נא ואמושך בני האתה זה בני עשו אם לא
MT: ויאמר יצחק אל יעקב גשׁה נא ואמשׁך בני האתה זה בני עשׂו אם לא
SP: ויגש יעקב אל יצחק אביו וימשהו ויאמר הקול קול יעקב והידים ידי עשו
MT: ויגשׁ יעקב אל יצחק אביו וימשׁהו ויאמר הקל קול יעקב והידים ידי עשׂו
SP: ולא הכירו כי היו ידיו כידי עשו אחיו שעירות ויברכהו
MT: ולא הכירו כי היו ידיו כידי עשׂו אחיו שׂערת ויברכהו
SP: ויאמר האתה זה בני עשו ויאמר אני
MT: ויאמר אתה זה בני עשׂו ויאמר אני
SP: ויאמר הגישה לי ואכל מציד בני למען תברכך נפשי ויגש לו ויאכל ויבא לו יין וישת
MT: ויאמר הגשׁה לי ואכלה מציד בני למען תברכך נפשׁי ויגשׁ לו ויאכל ויבא לו יין וישׁת
SP: ויגש וישק לו וירח את ריח בגדיו ויברכהו ויאמר ראו ריח בני כריח השדה מלא אשר ברכהו יהוה
MT: ויגשׁ וישׁק לו וירח את ריח בגדיו ויברכהו ויאמר ראה ריח בני כריח שׂדה אשׁר ברכו יהוה
SP: יתן לך האלהים מטל השמים ומשמני הארץ ורב דגן ותירש
MT: ויתן לך האלהים מטל השׁמים ומשׁמני הארץ ורב דגן ותירשׁ
SP: יעבדוך עמים וישתחוו לך לאמים הוי גביר לאחיך וישתחוו לך בני אמך ארריך ארור ומברכיך ברוך
MT: יעבדוך עמים וישׁתחו לך לאמים הוה גביר לאחיך וישׁתחוו לך בני אמך ארריך ארור ומברכיך ברוך
SP: ויעש גם הוא מטעמים ויבא לאביו ויאמר לאביו יקום אבי ויאכל מציד בנו בעבור תברכני נפשך
MT: ויעשׂ גם הוא מטעמים ויבא לאביו ויאמר לאביו יקם אבי ויאכל מציד בנו בעבור תברכני נפשׁך
SP: ויאמר אליו יצחק אביו מי אתה ויאמר אני בנך בכרך עשו
MT: ויאמר לו יצחק אביו מי אתה ויאמר אני בנך בכרך עשׂו
SP: ויחרד יצחק חרדה גדלה עד מאד ויאמר מי אפו הצד ציד ויבא לי ואכל מכל בטרם תבוא ואברכהו וגם ברוך יהיה
MT: ויחרד יצחק חרדה גדלה עד מאד ויאמר מי אפוא הוא הצד ציד ויבא לי ואכל מכל בטרם תבוא ואברכהו גם ברוך יהיה
SP: ויהי כשמע עשו את דברי אביו ויצעק צעקה גדלה ומרה עד מאד ויאמר לאביו ברכני גם אני אבי
MT: כשׁמע עשׂו את דברי אביו ויצעק צעקה גדלה ומרה עד מאד ויאמר לאביו ברכני גם אני אבי
SP: ויאמר בא אחיך במרמה ויקח את ברכתך
MT: ויאמר בא אחיך במרמה ויקח ברכתך
SP: ויאמר הכו קרא שמו יעקב ויעקבני זה פעמים את בכרתי לקח והנה עתה לקח ברכתי ויאמר הלא הצלת לי ברכה
MT: ויאמר הכי קרא שׁמו יעקב ויעקבני זה פעמים את בכרתי לקח והנה עתה לקח ברכתי ויאמר הלא אצלת לי ברכה
SP: ויען יצחק ויאמר לעשו הן גביר שמתיו לך ואת כל אחיו נתתי לו לעבדים ודגן ותירש סמכתיו ולך אפוא מה אעשה בני
MT: ויען יצחק ויאמר לעשׂו הן גביר שׂמתיו לך ואת כל אחיו נתתי לו לעבדים ודגן ותירשׁ סמכתיו ולכה אפוא מה אעשׂה בני
SP: ויאמר עשו אל אביו הברכה אחת היא לך אבי ברכני גם אני אבי וישא עשו קולו ויבך
MT: ויאמר עשׂו אל אביו הברכה אחת הוא לך אבי ברכני גם אני אבי וישׂא עשׂו קלו ויבך
SP: ויען יצחק אביו ויאמר אליו הן משמני הארץ יהיה מושבך מטל השמים ממעל
MT: ויען יצחק אביו ויאמר אליו הנה משׁמני הארץ יהיה מושׁבך ומטל השׁמים מעל
SP: ועל חרבך תחיה ואת אחיך תעבד והיה כאשר תהדר ופרקת עולו מעל צוארך
MT: ועל חרבך תחיה ואת אחיך תעבד והיה כאשׁר תריד ופרקת עלו מעל צוארך
SP: ויגד לרבקה את דברי עשו בנה הגדול ותשלח ותקרא ליעקב בנה הקטן ותאמר אליו הנה עשו אחיך מתנחם לך להרגך
MT: ויגד לרבקה את דברי עשׂו בנה הגדל ותשׁלח ותקרא ליעקב בנה הקטן ותאמר אליו הנה עשׂו אחיך מתנחם לך להרגך
SP: ועתה בני שמע בקולי וקום ברח לך אל לבן אחי חרנה
MT: ועתה בני שׁמע בקלי וקום ברח לך אל לבן אחי חרנה
SP: קום לך פדנה ארם בית בתואל אבי אמך וקח לך משם אשה מבנות לבן אחי אמך
MT: קום לך פדנה ארם ביתה בתואל אבי אמך וקח לך משׁם אשׁה מבנות לבן אחי אמך
SP: ויתן לך את ברכת אברהם אביך לך ולזרעך אתך לרשת את ארץ מגריך אשר נתן יהוה לאברהם
MT: ויתן לך את ברכת אברהם לך ולזרעך אתך לרשׁתך את ארץ מגריך אשׁר נתן אלהים לאברהם
SP: וירא עשו כי ברך יצחק את יעקב ושלח אתו פדנה ארם לקחת לו משם אשה בברכו אתו ויצוו עליו לאמר לא תקח אשה מבנות כנען
MT: וירא עשׂו כי ברך יצחק את יעקב ושׁלח אתו פדנה ארם לקחת לו משׁם אשׁה בברכו אתו ויצו עליו לאמר לא תקח אשׁה מבנות כנען
SP: וילך עשו ויקח את מחלת בת ישמעאל בן אברהם אחות נבאות על נשיו לו לאשה
MT: וילך עשׂו אל ישׁמעאל ויקח את מחלת׀ בת ישׁמעאל בן אברהם אחות נביות על נשׁיו לו לאשׁה